Тибо Куртуа "Атлетико" билан дербидаги шов-шувли эпизоддан кейин жазоланмайди.
Ла Лиганинг 8-туридан ўрин олган "Атлетико" - "Реал Мадрид" учрашуви (1:1) мухлисларнинг трибунадаги хатти-ҳаракатлари туфайли 15 дақиқага тўхтатилди. Улардан баъзилари ҳақоратомуз шиорлар айтишди, шунингдек, Куртуага қарата нарсалар отишди ва "Реал" дарвозабонига ўлим тилашди.
Ундан олдин белгиялик футболчи Эдер Милитаонинг голини нишонлаш учун дарвоза ортидаги трибуналар томон бурилиб: "Йўқолларинг!" деб бақирди. Жарима майдончасига биринчи объект учиб киргач, Куртуа қўлини трибуналар томон силтаб, мухлисларни ғазаблантирди.
Marca.com нашри хабарига кўра, Куртуа воқеа натижасида ҳеч қандай жазога тортилмайди. Учрашувнинг бош ҳаками Матео Бускетс Феррер ўйин ҳисоботида "Реал" дарвозабони хатти-ҳаракатларини акс эттирмади. Ла Лига ва Испания Қироллик футбол федерацияси делегатларининг ҳисоботларида ҳам Куртуанинг хатти-ҳаракатлари ҳақида ҳеч қандай гап йўқ, яъни мусобақа қўмитаси дарвозабонни жазолай олмайди.
Қайд этилишича, "Атлетико" Куртуанинг хатти-ҳаракатидан шикоят қилиши мумкин, аммо клуб буни режалаштирмаяпти.
