"Арсенал" футбол клуби яқинда ММА жангчиси Конор Макгрегор жамоанинг Чемпионлар лигаси ўйинидан сўнг майдонга тушган воқеадан хавотирда.
Ирландиялик курашчи лондонликлар жамоасининг "ПСЖ"га (2:0) қарши ўйинига ташриф буюрган, шундан сўнг у ҳазиллашиб ўзини футболчи Букайо Сака билан спарринг қилаётгандек кўрсатган ва Деклан Райс билан суратга тушган.
The Times нашри хабарига кўра, "Арсенал" ушбу эпизод такрорланмаслиги учун ўз хавфсизлик хизматини қайта кўриб чиқмоқчи.
Лондон клуби аллақачон Макгрегор ва унинг дўстлари 1 Access орқали ВИП чипталар олганини маълум қилган. Энди "Арсенал" футболчилар ва корпоратив меҳмонлар ўртасидаги мулоқот сиёсатини ўзгартириши мумкин.
