Дунёнинг биринчи рақамли теннисчиси сербиялик Новак Жокович Испания пойтахтида ўтказилаётган Мастерс туркумига кирувчи “Mutua Madrid Open” халқаро турнирининг иккинчи даврасида болгариялик Григор Димитровга 6-7, 7-6, 3-6 ҳисобида имкониятни бой берди.

Кеча бўлиб ўтган иккинчи босқич ўйинларида америкалик Жон Изнерни саралаш босқичидан асосий тўр баҳсларига чиққан испаниялик Пабло Андухарга 4-6, 4-6 ҳисобида, дунёнинг 8 рақамли теннисчиси Ришар Гаскени испаниялик Даниэл Химено-Траверга 5-7, 6-3, 4-6 ҳисобида имкониятни бой бериши ҳам кутилмаган ҳолат бўлди.

Иккинчи босқич мусобақаларида, шунингдек, испаниялик Фернандо Вердаско канадалик Милос Раонични 6-4, 2-6, 7-6 ҳисобида, британиялик Энди Маррэй германиялик Фиореан Майерни 7-6, 7-6 ҳисобида, франциялик Жил Симон ҳамюрти Жереми Чардини 6-4, 7-6 ҳисобида, швейцариялик Рожер Федерер эса чехиялик Радек Степанекни 6-3, 6-3 натижаси билан мағлуб этдилар.

Бугун иккинчи босқичнинг яна бир неча учрашувлари ўтказилади. Ушбу босқичда ҳамюртимиз Денис Истомин дунёнинг 4 рақамли ракетка устаси испаниялик Давид Феррерга қарши кортга чиқади.

Эслатиб ўтамиз, Ўзбекистоннинг биринчи рақамли теннисчиси Денис Истомин биринчи босқичда бельгиялик Хавьер Малисс устидан 6-2, 6-3 ҳисобида зафар қучган.