Англиянинг «Манчестер Юнайтед» клуби бош мураббийи Алекс Фергюсон мавсум якунига етгач, жамоадан кетади. Буни клуб расмий сайти расман тасдиқлади.
Бунинг натижасида Фергюсоннинг футболдаги сўнгги учрашуви 19 май куни «Вест Бромвич»га қарши учрашув бўлиб қолади. Шундан кейин Фергюсон клуб раҳбариятида фаолиятини давом эттиради.
«Ҳозир бундай қарорга келишнинг айни вақти деб ўйлайман. Мен учун жамоанинг кучлироқ пайтида кетишим муҳимроқ. Ўйлашимча, буни уддаладим», дейди мураббий.
Эслатиб ўтамиз, Фергюсон «Манчестер Юнайтед» бош мураббийлигига 1986 йилда келган ва 27 йиллик фаолияти мобайнида 13 маротаба Англия чемпионатида, 5 маротаба мамлакат кубогида ва икки маротаба Европа чемпионлар лигасида зафар қучган.
