2025 йилги U-17 Осиё кубоги саралаш босқичи учрашувлари олдидан жамоалар бош мураббийлари иштирокида матбуот анжумани ташкил этилди.

Ўзбекистон U-16 терма жамоаси бош мураббийи Ислом Исмоилов:

— Ушбу турнирга узоқ вақт давомида тайёргарлик кўрдик, ҳозирги вақтда барча футболчиларимиз энг оптимал спорт формасида, деб айта оламан.

Асосий мақсадимиз барча учрашувларда чиройли ўйин намойиш этиб, ғалаба қозониш ҳамда Саудия Арабистони мезбонлик қиладиган U-17 Осиё кубогига йўлланмани қўлга киритишдан иборат. Аввалроқ Ўзбекистон U-20 терма жамоаси ҳам Хитой Тайпейида ўтган саралаш турнири доирасидаги барча учрашувда ғалаба қозониб, Осиё кубогига йўл олган эди. Биз ҳам худди шу натижани такрорлашга ҳаракат қиламиз.

Рақиб жамоалари ҳақида

— Гуруҳ босқичида Ироқ, Фаластин ва Хитой Тайпейи билан ўйнаймиз. Мураббийлар штаби ва таҳлилчиларимиз билан биргаликда рақибларимизнинг ўйин услубларини тўлиқ ўргандик. Мураббийлар ҳамда футболчилар бор имкониятимизни ишга солиб, мухлисларимизни хурсанд қиламиз ва олдимизга қўйилган вазифани, албатта, бажарамиз.