Дунёнинг 11-ракеткаси Стефанос Циципас теннис бўйича Париж "Мастерс" турниридаги иштирокини ғалаба билан бошлади.
Грециялик теннисчи илк даврада ATP рейтингида 54-поғонада бораётган испаниялик Роберто Карбальес-Баэнани уч сет натижасига кўра мағлубиятга учратди - 4/6, 6/3, 6/3. Теннисчиларнинг ўзаро учрашувларидаги натижаси йириклашди - 4:0.
Бир дақиқаси кам икки соат давом этган баҳсда Циципас 11, Карбальес-Баэна 4 та эйс зарбасини амалга оширган. Қўшхатолар ҳам, брейклар ҳам бир хил кўринишда Стефанос фойдасига ҳал бўлди - 4 га 2!
Шу тариқа, Циципас "Мастерс" сериясига кирувчи турнирлардаги ўзиниг роппа-роса 100-ғалабасини қўлга киритди.
Энди у 1/16 финал учрашувида португалиялик Нуну Боргешдан устун келган чилилик Алехандро Табилога қарши кортга чиқади.
