3-ноябрь куни АПЛнинг 10-туридан ўрин олган “Манчестер Юнайтед” ва “Челси” учрашуви бўлиб ўтди.
Учрашув 1:1 ҳисобида якунланди. Ушбу учрашувнинг энг кўп муҳокама қилинган лаҳзаси "қизил иблислар" ҳимоячиси Лисандро Мартинеснинг лондонликларнинг ҳужумкор ярим ҳимоячиси Коул Палмерга нисбатан хавфли зарбаси бўлди.
Премьер-лиганинг собиқ ҳаками Кейт Хеткеттнинг фикрича, "Челси" футболчиси фаолиятини якунлашига олиб келиши мумкин бўлган жароҳат олиши мумкин эди.
"Мартинес Палмернинг тиззасига тепди ва рақибининг соғлигига таҳдид солди. Ҳакам ажойиб ҳолатда эди ва бу қоидабузарликни кўрди.
Очиғи, сариқ карточка бу вазиятда жуда енгил жазо ҳисобланади.
Бу аниқ хато ва ВАР ҳакамдан ушбу қоидабузарликни қайта кўриб чиқишни сўраши керак эди. Агар Мартинес кўпроқ куч билан зарба берганида, Палмернинг карьераси якунланган бўларди", - дея Хекеттнинг сўзларини келтиради Mirror.
