"Реал" бош мураббийи Жозе Моуринью Испания чемпионати 1-туридан қолдирилган "Реал Сосьедад"га қарши 4:1 ҳисобидаги ғалабадан кейин Винисиус Жуниорга нисбатан трибуналардан янграган ҳуштакларни маълум маънода адолатли деб ҳисоблашини айтди.

"Биз бундай ҳолатга аввал ҳам дуч келганмиз. Футболчиларга қўйиладиган талаблар клубнинг буюк тарихи билан боғлиқ. "Реал"да буюк футболчилар ва буюк жамоалар бўлган. Мухлис бўлиш бир нарса, "Реал" футболчиси бўлиш эса бутунлай бошқа нарса.

Мен ҳуштаклар дарҳол олқишларга айланишини сўрамайман. Ҳуштакларда ҳамиша маълум даражада адолат бор, чунки одамлар норози бўлган. Бир-икки ҳуштак ҳеч кимга зарар қилмайди, аксинча, яхшироқ бўлишга ҳам ёрдам беради.

Биз қийинчилик билан ғалаба қозонадиган ўйинлар ҳам бўлади. Испанияда яхши футболчилар ва кучли жамоалар бор. Улар кучли рақибларга қарши ўйнашдан қўрқмайди. Бошқа мамлакатларда бундай эмас — у ерда кўпроқ ҳимояланишади. "Реал Сосьедад" эса ғалаба учун ўйнади.

Винисиусни алмаштирганимга келсак, биз бир тилда гаплашамиз, шунинг учун ҳазиллашиш осон. Мен Винини гол урмасдан ва ижобий ҳиссиёт олмасдан туриб ҳеч қачон алмаштирмаган бўлардим.

Уни алмаштирдим, чунки унга бироз дам олиш керак — уч кундан кейин яна ўйинимиз бор. Гол урганидан кейин уни алмаштириш тўғри қарор деб ўйладим. У мухлисларнинг меҳрини ҳис қилиши учун майдондан чиқариш яхши бўлди", — деди Моуринью. Унинг сўзларини AS келтирди.