"Real" bosh murabbiyi Joze Mourinyu Ispaniya chempionati 1-turidan qoldirilgan "Real Sosyedad"ga qarshi 4:1 hisobidagi g‘alabadan keyin Vinisius Juniorga nisbatan tribunalardan yangragan hushtaklarni ma’lum ma’noda adolatli deb hisoblashini aytdi.

"Biz bunday holatga avval ham duch kelganmiz. Futbolchilarga qo‘yiladigan talablar klubning buyuk tarixi bilan bog‘liq. "Real"da buyuk futbolchilar va buyuk jamoalar bo‘lgan. Muxlis bo‘lish bir narsa, "Real" futbolchisi bo‘lish esa butunlay boshqa narsa.

Men hushtaklar darhol olqishlarga aylanishini so‘ramayman. Hushtaklarda hamisha ma’lum darajada adolat bor, chunki odamlar norozi bo‘lgan. Bir-ikki hushtak hech kimga zarar qilmaydi, aksincha, yaxshiroq bo‘lishga ham yordam beradi.

Biz qiyinchilik bilan g‘alaba qozonadigan o‘yinlar ham bo‘ladi. Ispaniyada yaxshi futbolchilar va kuchli jamoalar bor. Ular kuchli raqiblarga qarshi o‘ynashdan qo‘rqmaydi. Boshqa mamlakatlarda bunday emas — u yerda ko‘proq himoyalanishadi. "Real Sosyedad" esa g‘alaba uchun o‘ynadi.

Vinisiusni almashtirganimga kelsak, biz bir tilda gaplashamiz, shuning uchun hazillashish oson. Men Vinini gol urmasdan va ijobiy hissiyot olmasdan turib hech qachon almashtirmagan bo‘lardim.

Uni almashtirdim, chunki unga biroz dam olish kerak — uch kundan keyin yana o‘yinimiz bor. Gol urganidan keyin uni almashtirish to‘g‘ri qaror deb o‘yladim. U muxlislarning mehrini his qilishi uchun maydondan chiqarish yaxshi bo‘ldi", — dedi Mourinyu. Uning so‘zlarini AS keltirdi.