Жума оқшомида «Лечче» Италия чемпионати доирасида ўз уйида «Эмполи»ни мағлуб эта олмади – учрашув 1:1 ҳисобида дуранг билан якунланди. Эртаси куни «Лечче» Лука Готти жамоа бош мураббийлигидан истеъфога чиққанини эълон қилди. Клуб раҳбарияти 57 ёшли мутахассисга меҳнати учун миннатдорчилик билдириб, келгусида муваффақиятлар тилади.
Лука Готти март ойининг ўрталаридан бери «Лечче»га устозлик қилиб келади. Ушбу мураббий бошчилигидаги 24 ўйинда жамоа олти ғалаба, етти дуранг ва ўн бир мағлубият қайд этган.
«Лечче» ҳозирда А Серия турнир жадвалида 18-ўринда, яъни қуйи лигага тушиб кетиш зонасида жойлашган.
