Усмон Дембеле ва Уэсли Фофана жароҳати сабаб ноябрь ойида Франция терма жамоасида ўйнамайди.
Франция терма жамоаси матбуот хизмати Фофана тиззасидаги муаммолар туфайли терма жамоанинг навбатдаги йиғинини ўтказиб юборишини маълум қилди. "Челси" ҳимоячиси ўрнига терма жамоага Бенжамин Павар чақирилди.
Усмон Дембеле ҳам ноябрь ойида Лига 1 нинг "Анже"га қарши ўйинида (4:2) олган ўнг сон қисмидаги жароҳати туфайли Франция терма жамоасида ўйнамайди.
"ПСЖ"нинг хабар беришича, қанот ҳужумчиси жиддий жароҳатдан қутулиб қолган - Дембеле бир неча кун давомида тикланиш жараёнларидан ўтади. Усмон ўрнига Франция терма жамоасига Кингсли Коман чақирилди.
Ҳозирги халқаро танаффусда Франция Миллатлар Лигасида Исроил ва Италия терма жамоалари билан ўйнайди. Учрашувлар 14 ва 17 ноябрь кунлари бўлиб ўтади.
