"Челси" вингери Нони Мадуэке "Арсенал"га қарши кечган ўйинда (1:1)алмаштирилганидан кейин ўзининг хатти-ҳаракати ҳақидаги танқидларга жавоб берди.

68-дақиқада "Стэмфорд Бридж" майдонидаги ўрнини Михаил Мудрикга бўшатиб берган Мадуэке заҳирадан жой олишдан бош тортган ҳолда, дарҳол трибуна остидаги туннелга югурди. Ўшанда "Манчестер Юнайтед"нинг собиқ ҳимоячиси Рио Фердинанд Нони жамоадошларига нисбатан ҳурматсизлик қилгани ва у жаримага тортилиши кераклиги ҳақида фикр билдирди.

Мадуэке "Челси"нинг собиқ мураббийлар штаби аъзоси Жоди Моррис томонидан ҳам танқид қилинган, аммо 22 ёшли англиялик футболчининг жиддий сабаблари бор.

"Мен том маънода ҳожатхонага бориш учун туннелга кирдим ва 30 сониядан сўнг қайтиб чиқдим. Кўп ўйинларда кўрган бўлсангиз, доим захирага олинсам кийиниш хонасига йўл оламан, чунки ҳожатхонага кираман. Бу ерда ёмон нарса йўқ", - деди Мадуэке talkSPORT билан суҳбатда.