"Chelsi" vingeri Noni Madueke "Arsenal"ga qarshi kechgan o‘yinda (1:1)almashtirilganidan keyin o‘zining xatti-harakati haqidagi tanqidlarga javob berdi.
68-daqiqada "Stemford Bridj" maydonidagi o‘rnini Mixail Mudrikga bo‘shatib bergan Madueke zahiradan joy olishdan bosh tortgan holda, darhol tribuna ostidagi tunnelga yugurdi. O‘shanda "Manchester Yunayted"ning sobiq himoyachisi Rio Ferdinand Noni jamoadoshlariga nisbatan hurmatsizlik qilgani va u jarimaga tortilishi kerakligi haqida fikr bildirdi.
Madueke "Chelsi"ning sobiq murabbiylar shtabi a’zosi Jodi Morris tomonidan ham tanqid qilingan, ammo 22 yoshli angliyalik futbolchining jiddiy sabablari bor.
"Men tom ma’noda hojatxonaga borish uchun tunnelga kirdim va 30 soniyadan so‘ng qaytib chiqdim. Ko‘p o‘yinlarda ko‘rgan bo‘lsangiz, doim zaxiraga olinsam kiyinish xonasiga yo‘l olaman, chunki hojatxonaga kiraman. Bu yerda yomon narsa yo‘q", - dedi Madueke talkSPORT bilan suhbatda.
