Футбол бўйича 2026 йилда ўтказиладиган Жаҳон чемпионатининг Осиё минтақаси 3-саралаш босқичи 6-тур доирасида Ўзбекистон миллий жамоаси сафарда Шимолий Корея жамоасига қарши майдонга тушиб қийин учрашувда 0:1 ҳисобида ғалаба қозонди.
Учрашувни фаол бошлаган ўзбекистонликлар биринчи бўлимнинг сўнгги дақиқаларида Аббосбек Файзуллаевнинг чиройли зарбаси эвазига олдинга чиқиб олди.
Иккинчи бўлимда тўлиқ ҳимояга эътибор қаратган меҳмонлар якунда 10 киши бўлиб ғалабани ушлаб қолишга эришди. 80-дақиқада Умар Эшмуродов тўпни қўли билан ўйнади. VAR’ни кўрган ҳакам пенальти белгилаш билан бирга ҳимоячига қизил карточка кўрсатди. Ўткир Юсуповнинг қаҳрамонлиги эвазига Лаосдаги учрашувда миллий жамоа дарвозаси даҳслизлиги сақланиб қолди.
Sofascore ушбу баҳсда ҳаракатланган ўйинчилар учун баҳоларни эълон қилди. Унга кўра, Ўзбекистон терма жамоасининг ягона голига муаллифлик қилган Аббосбек Файзуллаев 7,8 баллга лойиқ кўрилган.
Пенальтини қайтариб қаҳрамонга айланган Ўткир Юсуповнинг ўйини 7,7 баллга баҳоланди. Ҳимоячи Абдуқодир Ҳусанов ва Одилжон Ҳамробековларнинг ўйини 7,4 баллга лойиқ кўрилди.
Ўзбекистон терма жамоаси сафида пенальтига сабабчи бўлган Умар Эшмуродов энг паст 6,5 балл билан баҳоланди. Захирадан майдонга тушган Ҳожимат Эркинов ва Азизбек Турғунбоев 6,6 баллга лойиқ кўрилган.
Шимолий Корея таркибида ҳимоячи Ким Ю Сонг энг юқори 7,5 балл билан жамоадошлари орасида энг яхши кўрсаткични қайд этди. Чап қанот ярим ҳимоячиси Ил Сонг Ри 6,1 балл билан нафақат кореяликлар сафида, балки ўйинда энг ёмон ўйин кўрсатган ўйинчи сифатида қайд этилди.
Маълумот учун, ушбу ғалабадан сўнг Ўзбекистон терма жамоаси ўз очколари сонини 13 тага етказиб олди ва А гуруҳида иккинчи ўринни эгаллаб турибди. Терма жамоа 7-тур учрашувини келаси йилнинг март ойида ўтказади. 20 март куни Тошкентда бўлиб ўтадиган учрашувда қўшни Қирғизистон рақиблик қилади.
