Халқаро футбол ассоциацияси (FIFA) ноябрь ойи учун миллий жамоаларнинг янгиланган рейтингини эълон қилди.
Унга кўра, Ўзбекистон миллий терма жамоаси октябрь ойидаги каби 58-ўринда қайд этилди. Жамоа ҳозирда 1424,93 очко тўплаб, Осиёнинг 7-жамоаси бўлиб турибди. Октябрь ойидаги рейтингда Ўзбекистон жамоаси 1429 очко тўплаган эди. Осиёда кучли учликдан Япония, Эрон ва Корея Республикаси жой олган.
Рейтингнинг энг юқори ўрнида амалдаги Жаҳон чемпиони Аргентина жамоаси ўрин олган. Кейинги ўринларда Франция ҳамда Испания термалари жойлашган. Месси сардорлигидаги жамоа ноябрь ойидаги баҳсларни муваффақиятсиз ўтказганига қарамай етакчиликни сақлаб қолган.
Маълумот учун, Ўзбекистон ноябрь ойидаги FIFA кунларида иккита учрашувда майдонга тушди. 14 ноябрь куни Қатарга сафар уюштирган жамоа 2:3 ҳисобида мағлуб бўлди. 5 кундан сўнг Лаосда ўтказилган Шимолий Кореяга қарши майдонга тушган ўзбекистонликлар Аббосбек Файзуллаевнинг ягона голи эвазига ғалаба қозонди.
Ўзбекистон миллий жамоаси навбатдаги учрашувни келгуси йили март ойида ўтказади. 20 март кунига белгиланган баҳсда Ўзбекистон ўз уйида Қирғизистонни қабул қилади.
