Немис жамоаси ҳужумчиси Умар Мармушнинг ўйинини кузатиш мақсадида Европа Лигаси умумий босқичи 5-туридан ўрин олган "Мидтьюлланн" - "Айнтрахт Франкфурт" (1:2) учрашувида "Барселона" вакиллари ҳозир бўлишди. Бу ҳақда Tipsbladet хабар бермоқда.
Манбага кўра, "Барселона" президенти Жоан Лапорта 36 ёшли Роберт Левандовски ўрнини боса оладиган янги ҳужумчи билан шартнома имзоламоқчи. Мармуш ана шундай футболчилардан бири саналади.
Жорий мавсумда Мармуш барча турнирларда 18 та учрашувда қатнашиб, 15 та гол ва 11 та голли узатмани амалга оширди. Футболчининг клуб билан амалдаги шартномаси 2027 йилнинг ёзига қадар тузилган. Transfermarkt порталида берилган маълумотларга кўра, футболчининг бозор қиймати 40 миллион еврони ташкил қилади.
