Наманган шаҳрида аёллар жамоалари ўртасида Ўзбекистон чемпионати саралаш баҳсларининг 2-тур учрашувларига якун ясалди.
“Шарқий” минтақада олий лигага бериладиган олти йўлланма учун саккиз жамоа кураш олиб борди.
Аваз Мақсумов бош мураббийлигидаги “Бунёдкор” аёллар жамоаси ўз олдига қўйилган вазифани бажара олди. Мезбонлар “Навбаҳор” (7:1) ва Тошкентнинг “Пахтакор” (8:1) жамоалари йирик ҳисобларда доғда қолдирилди. Жиззахнинг “Аланга” жамоаси Наманганга етиб кела олмаганлиги боис “Бунёдкор”га техник ғалаба ёзилди. Биргина мағлубият эса Бекободнинг “Металлург” аёллар жамоасидан қабул қилиб олинди – 1:2.
“Қалдирғочлар” саккиз жамоа орасида учинчи ўринни қўлга киритиб, олий лигага бериладиган йўлланмаларнинг бирини банд этди.
Олий лига баҳслари август ойида старт олади. Унда жами 12та жамоа иштирок этади.
