Тошкентнинг "Ҳумо" хоккей клуби Қозоғистон чемпионати доирасидаги навбатдаги ўйинини ўтказди.
"Қанотлилар" Остона шаҳрида "Иртиш" клуби меҳмони бўлишди. Еттита шайба киритилган ўйинда "Ҳумо" 4:3 ҳисобида ғалаба қозонди.
Денис Лудцев дублга эришган бўлса, қолган икки голга Егор Буялский ва Антон Асташевич муаллифлик қилди.
Жамоалар шу кунга қадар кечаги учрашув билан қўшиб ҳисоблаганда 13 та ўйин ўтказиб, уларнинг барчасида "Ҳумо" зафар қучган.
Жамоамиз Қозоғистон чемпионатининг жорий мавсумида ҳозирча 25 та ўйиндан кейин 33 очко жамғарган ҳолда 5-ўринни эгаллаб турибди.
"Ҳумо"га нисбатан икки ўйин кам ўтказган аутсайдер "Иртиш" эса 6 очко билан сўнгги, 11-поғонадан жой олган.
