Ўзбекистоннинг амалдаги чемпиони Тошкентнинг “Бинокор” хоккей клуби Қозоғистон хоккей лигасининг таклифига кўра бир қатор ўртоқлик учрашувларини ўтказиш мақсадида бугун Алмати шаҳрига жўнаб кетди.

Жамоа сардори Алишер Азимовнинг маълум қилишича, “Бинокор”чилар Қозоғистоннинг 4 та етакчи клублари билан ўртоқлик учрашувини ўтказади. Дастлабки ўйин 24 май куни Алмати шаҳридаги “Олимпийский” муз саройида ўтказилиб, унда ҳамюртларимиз Қозоғистон хоккей лигасининг бу йилги пешқадами “КазРосГаз” (Алмати) жамоаси билан куч синашадилар. Шу кунга белгиланган иккинчи учрашувда “Бинокор”чилар “СКИФ–2” (Алмати) клубига қарши майдонга тушадилар. 25 май куни хоккейчиларимиз Алматининг яна бир жамоаси “Форд Верний” жамоаси билан баҳс юритадилар. Ўртоқлик учрашувларининг сўнггиси 26 май кунига белгиланган бўлиб, унда “Бинокор”чилар Қозоғистон хоккей лигасининг бу йилги мусобақасида 4-ўринда бораётган “Беркут” жамоасига қарши баҳс олиб борадилар.

“Ўртоқлик учрашувлари орқали бўлажак мусобақаларга ҳозирлик кўрилади. Айни пайтда Осиё ва Европанинг бир қатор давлатларидан ҳам ўртоқлик учрашувларини ўтказиш бўйича таклифларни ўрганиб чиқмоқдамиз. Бу масалага Қозоғистон сафаридан қайтгач аниқлик киритилади”, - дейди “Бинокор” хоккей клуби сардори Алишер Азимов.