Саудия Арабистони Про-лигаси клублари «Манчестер Юнайтед» ҳужумчиси Маркус Рэшфордга таклиф билан чиқишга тайёр. Футболчи фаолиятидаги янги чақирувга тайёр кўринади.

Хабарларга кўра, 27 ёшли Рэшфордга Саудия Арабистони клублари қизиқиш билдирмоқда, улар шунингдек, Премьер-лиганинг бошқа юлдузлари «Ливерпуль» аъзоси Муҳаммад Салоҳ ва «Манчестер Сити»дан Кевин Де Брюйне билан шартнома имзолашни режалаштирмоқда. Учала футболчи ҳам маҳаллий чемпионат савиясини ошириш учун керакли профилга эга футболчилар саналади.

Футболчининг трансферига «Ал-Иттиҳод», «Ал-Ҳилол», «Ан-Наср» ва «Ал-Аҳли» клублари қизиқиш билдириши мумкин. Бироқ, Рэшфордни қўлга киритиш учун ушбу клублардан бири жамоада хорижлик футболчига жой бўшатиши керак бўлади.

Маркус Рэшфорд жорий мавсумда «Манчестер Юнайтед» сафида 24 та ўйинда майдонга тушиб, 7 та гол урди ва 3 та голга ассистентлик қилди. «Transfermarkt» порталига кўра, унинг нархи 55 миллион еврога баҳоланмоқда.