Saudiya Arabistoni Pro-ligasi klublari «Manchester Yunayted» hujumchisi Markus Reshfordga taklif bilan chiqishga tayyor. Futbolchi faoliyatidagi yangi chaqiruvga tayyor ko‘rinadi.
Xabarlarga ko‘ra, 27 yoshli Reshfordga Saudiya Arabistoni klublari qiziqish bildirmoqda, ular shuningdek, Premyer-liganing boshqa yulduzlari «Liverpul» a’zosi Muhammad Saloh va «Manchester Siti»dan Kevin De Bryuyne bilan shartnoma imzolashni rejalashtirmoqda. Uchala futbolchi ham mahalliy chempionat saviyasini oshirish uchun kerakli profilga ega futbolchilar sanaladi.
Futbolchining transferiga «Al-Ittihod», «Al-Hilol», «An-Nasr» va «Al-Ahli» klublari qiziqish bildirishi mumkin. Biroq, Reshfordni qo‘lga kiritish uchun ushbu klublardan biri jamoada xorijlik futbolchiga joy bo‘shatishi kerak bo‘ladi.
Markus Reshford joriy mavsumda «Manchester Yunayted» safida 24 ta o‘yinda maydonga tushib, 7 ta gol urdi va 3 ta golga assistentlik qildi. «Transfermarkt» portaliga ko‘ra, uning narxi 55 million yevroga baholanmoqda.
