ЖЧ саралаш баҳслари яқинлашаркан ҳар бир терма жамоалар тайёргарликка зўр бериши тайин. Ўзбекистон терма жамоасининг асосий рақибларидан бўлган Жанубий Корея терма жамоаси 27 май куни Пажу терма жамоа машғулот базасига тўпланади ва 29 майда Ливан билан ўйинни ўтказиш учун чартер рейс билан парвоз қилишади.
Куни кеча корейслар бош мураббийи Чой Канг Хи "Best Eleven" нашрига келаётган ўйинлар ҳақидаги фикрлари ва режалари билан ўртоқлашди.
"Аввало сўнгги ўйинлардаги муваффақиятсиз иштирок учун барчадан узр сўрайман", дея сўз бошларкан жаноб Чой жумладан шундай деди: "Мен барчани ишонтириб айтишим мумкинки, яқинлашаётган барча учта ўйинни ўз фойдамизга ҳал этишимизни ваъда бераман. Шу учала ваъдам ижобати учун бор кучим ва билимимни аямайман".
Шунингдек, кореяликлар бош мураббийининг сўзларига қараганда, корейсларнинг энг асосий мақсади Эрон билан сафардаги мағлубият учун реванш олиш деб қаралмоқда.
"Эрон билан ўйиннинг қиммати ЖЧ йўлланмасидан ҳам юқорироқ деб биламан. Ахир ўтган йилги мағлубият аламини олишимиз керакми-йўқми?", - дея риторик саволни ўртага қўяркан, “Нафақат мен, балки барча шогирдларим бу ўйинни интиқлик билан кутишмоқда. Биз Эрон билан Осиё Кубоги ёки ЖЧ саралашларида юзма-юз келишимиз деярли аниқ бўлган рақиблармиз. Шундай экан, Жанубий Корея Эрондан бир бош устун эканлигини исботлаб қўйишдек имконият ҳар куни келавермайдику?", дейди Чой Канг Хи.
Кореяликлар бош мураббийи саралашнинг сўнгги ўйинларида ҳам натижа, ҳам ўйин сифати бўйича кўзланган мақсадига эришишни мўлжалламоқда.
"Мен терма жамоа бошқарувини қўлга олганимга роппа-роса 1 йилу 6 ой бўлди. Терма жамоадаги фаолиятимнинг энг юқори чўққисини саралашнинг сўнгги уч ўйинида кўрасизлар", - деди Чой Канг Хи.
Жанубий Корея бош мураббийи ҳозирданоқ ишонч билан ЖЧ йўлланмаси аллақачон чўнтагида тургандек гапирмоқда. Кузатишда давом этамиз, ҳамма масала майдонда ҳал бўлишини инобатга олсак, ҳали олдинда корейсларни осон бўлмаган ўйинлар кутмоқда.
Отабек Йўлдошев, Сеул.
