Олдинроқ каталонияликлар Ольмо ва Пау Викторни мавсумнинг иккинчи ярми учун рўйхатдан ўтказа олмагани маълум бўлганди. Ла Лига уларни қайдномадан олиб ташлади.
Ольмо шартнома шартларига кўра, агар рўйхатдан ўтмаган бўлса, "Барса"ни эркин агент сифатида тарк этиш ҳуқуқига эга.
Агар шундай бўладиган бўлса, "блауграна" ярим ҳимоячига ёзда тузилган шартноманинг бутун муддати учун маош тўлаши керак бўлади, деб ёзади Mundo Deportivo. Шартнома 2030 йилгача амал қилади.
Қолаверса, Олмо қишда текинга кетса, "Барселона" балансида муаммолар юзага келади.
Mundo Deportivo нашрининг таъкидлашича, испаниялик футболчининг "РБ Лейпциг"дан трансфери "Барса"га 48 миллион еврога тушган. Оддий вазиятда, 48 миллион трансфер нархи Ольмонинг шартномасининг бутун муддати учун тенг равишда ҳисобга олинади. Шартноманинг ҳар 6 йили учун 8 миллион евро. Агар Ольмо ҳозир эркин агент сифатида кетса, 48 миллионнинг барчаси жорий мавсумдаги йўқотиш сифатида ҳисобга олинади ва бу Каталония клубининг молиявий ҳолатига салбий таъсир қилади.
