Ўмон пойтахти Маскат шаҳрида шахмат бўйича ўтказилган “Muscat International Chess Championship 2024” турнирида ўзбекистонлик шахматчилар муваффақиятли иштирок этди.
Баҳслар давомида гроссмейстерлик унвонини қўлга киритган Ортиқ Нигматов 9 имкониятдан 8 очко тўплаб турнир ғолибига айланди.
Мусобақада 5-рақам остида таснифланган Нигматов баҳслар давомида 7 ғалаба ва 2 дуранг қайд этди. У 8-турда мусобақанинг биринчи тартиб рақамли шахматчиси ҳамюртимиз Абдумалик Абдусалимов билан муроса йўлини танлади.
Турнирда 2-ўринни 7,5 очко билан эронлик Махди Голами Орими эгаллади. 3-ўринни 6 та ғалаба, 3 та дуранг қайд этган ҳамюртимиз Абдумалик Абдусалимов (7,5 очко) банд этди. 4- ва 5-ўринлардан жой олган мисрлик шахматчилар Ҳамед Вафа ва Адҳам Фавзи ҳам 7,5 очко жамғаришга муваффақ бўлишди.
Ўзбекистонлик яна бир шахматчи Алексей Барсов 7 очко тўплаган ҳолда 206 нафар иштирокчи орасида 10-ўринни қўлга киритди.
Айтиш лозим, турнирда қатнашган 206 нафар шахматчининг 5 нафари бирор турда мағлубиятга учрамаган бўлса, уларнинг 3 нафари айнан ўзбекистонлик шахматчилар.
