"Манчестер Юнайтед" ҳимоячиси Харри Магуайрга автомобил ҳайдаш тақиқланди. Болтон Кроун суди Магуайрни 56 кунлик ҳайдовчилик ҳуқуқидан маҳрум қилди, деб хабар беради BBC.

Бундан ташқари, футболчи 666 фунт стерлинг миқдорида жаримага тортилди. Харри шунингдек, суд харажатлари учун 120 фунт стерлинг ва жабрланувчи учун 266 фунт стерлинг қўшимча тўлаши керак бўлади.

Магуайрнинг жазоланиши ўтган йилнинг 5 мартида содир бўлган воқеа билан боғлиқ. Футболчи ўз автомобилини соатига 85 миля тезликда 50 миляли зонада ҳайдаб кетаётганда камерага тушиб қолган.