Ўзбекистоннинг амалдаги чемпиони Тошкентнинг «Бинокор» хоккей клуби Олмаота шаҳрида (Қозоғистон) маҳаллий жамоалар билан бир қатор ўртоқлик учрашувини ўтказди.

Дастлабки ўйин 24 май куни Олмаота шаҳридаги «Олимпийский» муз саройида ўтказилиб, унда ўзбекистонликлар Қозоғистон хоккей лигасининг бу йилги пешқадами «ҚазРосГаз» (Олмаота) жамоаси билан куч синашдилар. Учрашув ўртоқлик мақомини олган бўлса-да, майдонда муросасиз кураш кечди ва 3:1 ҳисобида мезбонларнинг ғалабаси билан якунланди.

Ушбу ўйиндан ярим соат кейин Алишер Азимов бошчилигидаги «Бинокор»чилар иккинчи ўртоқлик учрашувида маҳаллий «СКИФ-2» жамоаси билан куч синашдилар ва 6:3 ҳисобида ғалабага эришишди.

Қозоғистон хоккей лигасининг бу йилги пешқадамларидан бири «Беркут» жамоаси билан бўлиб ўтган сўнгги ўртоқлик учрашуви мезбонлар фойдасига ҳал бўлди – 3:5.

«Турли сабабларга кўра жамоамизнинг 4 нафар асосий таркиб ўйинчиларини Қозоғистон сафарига бора олмаганликлари натижаларга ўз таъсирини кўрсатмай қолмади, – дейди «Бинокор» сардори Алишер Азимов. – Шунга қарамай, жамоамиз техник жиҳатдан рақиблардан сезиларли даражада устунликка эга бўлгани яққол кўзга ташланиб турди. Буни маҳаллий мутахассислар ҳам таъкидлаб ўтишди. Айниқса, иккинчи учрашувдаги ғалабадан сўнг мухлислар бизни олқишлар билан кузатиб қолишди. Бу, албатта, ҳар қандай спортчи учун ёқимли ҳолат. Кейинги режалар ҳақида тўхталадиган бўлсам, жорий йил декабрь ойида Тошкентда халқаро турнир ўтказишни режалаштиряпмиз. Бундан ташқари, бир қатор давлатлардан халқаро турнирларда иштирок этиш учун таклифлар ҳам олганмиз».