"Реал Мадрид" клуби телеканали Диего Симеоненинг ҳакамлик ҳақидаги сўзларига жавоб қайтарди.
Мадриднинг "Реал" клуби Испания кубоги 1/8 финалида "Сельта"ни қўшимча бўлимларда мағлуб этди (5:2), асосий вақт дуранг билан якунланди – 2:2. Биринчи бўлимда дарвозабон Андрей Лунин ярим ҳимоячи Виллиот Сведбергни жарима майдончаси ичида ушлаб қолганидан кейин бош ҳакам Хосе Мунуера Монтеро қоида бузилишини қайд этмади.
Ўйиндан сўнг "Атлетико" бош мураббийи ушбу ўйиндаги ҳакамларнинг қарорлари ҳақида гапирди: "Бу юз йилдан бери содир бўлмоқда. Одамлар нимага ҳайрон қолишаётганини билмайман".
"Мен бироз хавотирдаман, чунки Ла Лига қайтди ва "Барселона" реакцияга киришгунча "Атлетико" билан яккама-якка ўйин ўтказадиганга ўхшайди. "Атлетико" ҳакамлик тизимидан анчагина фойда кўраётган жамоа. "Вик" содир бўлмаган пенальтидан жабр кўрди, "Осасуна" яқинда Рубен Гарсияга нисбатан пенальтидан шикоят қилди, "Алавес" 1:0 ҳисобида ғалаба қозонаётган пайтда белгиланмаган пенальтидан нолиди.
Ўтган йили "Реал Мадрид" "Атлетико"га қарши ўйинларда ҳакамлик тизими туфайли катта зарар кўрганди. Ла Лига 20/21 ҳақида нима дейиш мумкин? "Атлетико" ушбу ҳакамлик тизими эвазига ғалаба қозонди. Бу дунёдаги энг кўп маош олувчи мураббийлардан бирининг жамоасига қарши ўйин олдидан ташвиш", - деди Хесус Алькайде "Реал Мадрид" клуби телеканалида.
