Мавсум арафасида кўпчилик бу жамоани аутсайдерлардан бирига айланишини тахмин қилганди. Лекин ёш мутахассис Бахтиёр Ашурматов бошчилигида гулистонликлар бу фикрларнинг нотўғри эканини исботлай олишди. 14 очко тўплаган Сирдарё вилояти вакиллари турнир жадвалида 6-поғонадан ўрин олишган. Футболчиларнинг имкониятидан келиб чиқиб, тўғри тактика танлаётган Ашурматов "Пахтакор" билан беллашувда ҳам шогирдларини кескин курашга руҳлантириши табиий.

Бу жамоалар ўртасидаги ўзаро ўйин охирги марта 2003 йилги мавсумда кузатилган. Ўшанда "Пахтакор" ҳар икки баҳсда ғалаба қозонган. Ҳозиргач ўтган 8 учрашувнинг 4тасида жамоамиз зафар қучган, қолган ўйинларда дуранг қайд этилган. "Шерлар" рақиб дарвозасини 23 бор ишғол қилганлар, "Гулистон" эса 6 марта. Тошкентдаги беллашувларнинг 3тасида жамоамиз муваффақиятга эришган.

Баҳсни дисквалификация туфайли ўтказиб юборадиган футболчилар мавжуд эмас. Ёшлар жамоалари 31 май, жума "Пахтакор" стадионида соат 18:00да баҳсни бошласалар, асосий таркиблар ўйини 1 июнь, шанба куни соат 19:00да "Пахтакор" стадионида старт олади. Мазкур ўйинга барча мухлисларни таклиф этиб қоламиз.

«Пахтакор» (Тошкент) – «Гулистон» (Гулистон)
Ҳакамлар: И.Танташев (Бухоро), А.Қўлдошев (Бухоро), Б.Қодиров (Бухоро), О.Тўйчибоев (Тошкент).
Назоратчи: А.Арутюнов (Тошкент).