АҚШнинг Невада штати Лас-Вегас шаҳрида навбатдаги профессионал бокс турнири ташкил этилди.
Оқшомнинг марказий жангида яримоғир вазн тоифаси вакиллари - америкалик 28 ёшли Дэвид Бенавидес кубалик Дэвид Моррелл ўзаро тўқнаш келишди. Мағлубият нималигини билмай келаётган боксчилар вақтинчалик WBC чемпионлиги ҳамда WBA Regular камари учун рингга кўтарилишди.
Ғолиб боксчи яримоғир вазн тоифасида мутлақ жаҳон чемпионига қарши жанг ўтказиш имкониятини қўлга киритарди. Ҳозирда бу вазнда Канада шарафини ҳимоя қилаётган россиялик Артур Бетербиев мутлақ жаҳон чемпиони ҳисобланади. У 22 февраль куни Ар-Риёд шаҳрида Дмитрий Биволга қарши реванш жангида рингга чиқади.
Бенавидес ва Моррелл ўртасидаги жанг тўлиқ 12 раунд давом этди ва якунда ҳакамлар қарорига кўра америкалик боксчи 118-108, 115-111, 115-111 ҳисобларида ғалаба қозонди. Ўнинчи раундда Моррель Бенавидесни енгил нокдаун ҳолатига тушириб қўйишга ҳам муваффақ бўлди, аммо гонгдан кейин зарба бергани учун огоҳлантириш ҳам ишлаб олди.
The Ring нашри хабарига кўра, Дэвид Бенавидесни Турки Ал аш-Шейх Ар-Риёдга, 22 февраль куни Артур Бетербиев ва Дмитрий Бивол ўртасида ўтказиладиган бокс турнирига таклиф қилган.
