Бугун, 8 февраль куни Хитойнинг Ҳарбин шаҳрида ўтаётган IX қишки Осиё ўйинлари дастурида доирасида 8 та спорт туридаги баҳслар ўтказилиб, уларнинг 7 тасида совринли ўринлар учун курашлар бўлиб ўтади.

Кун давомида Ўзбекистон терма жамоасининг 5 нафар вакили саралаш ва совринли ўринлар учун кечадиган курашларда ўз омадини синовдан ўтказади.

Шорт-трек бўйича Ўзбекистон шарафини ҳимоя қилаётган Даниил Ейбог 500 ва 1000 метр масофада 1/4 финал дастуридаги иштирокини давом эттирса, 1500 метрда кечадиган ярим финал ва финал мусобақаларида ўз маҳоратини намойиш этади.

Шунингдек, тоғ чанғичиларимиз Сабина Режепова, Валерия Ковалёва, Ксения Григорьева ва Мария Морозова Осиё ўйинларида Жанубий Корея, Япония, Хитой каби 11 та давлатнинг 45 нафар спортчиси билан қитъа ўйинларининг медаллари учун курашга киришади.

Эслатиб ўтамиз, 14 февралга қадар давом этадиган “кичик олимпиада"нинг қишки ўйинларида 34 та давлат спортчилари 11 та спорт турининг 64 та медаллар жамланмаси учун кураш олиб бормоқда.