Эртага, 12 февраль куни Хитойда U20 ёш тоифасида футбол бўйича Осиё кубоги бошланади. Унда қитъамизнинг 16 мамлакат терма жамоаси тўрт гуруҳга бўлинган ҳолда ўзаро рақобатлашади. Мазкур кубок 1 март кунига қадар давом этади.

Чемпионатнинг “А” гуруҳида Хитой, Австралия, Қирғизистон ва Қатар термалари жой олган бўлиб, ушбу гуруҳдаги илк учрашувлар 12 февраль куни бўлиб ўтади. Унда Австралия – Қирғизистон, Хитой – Қатар терма жамоалари ўзаро майдонга тушади. “B” гуруҳидаги дастлабки беллашувлар эса 13 февраль куни Ироқ – КХДР ўйини билан бошланиб, Иордания – Саудия Арабистони учрашуви билан якунланади.

Фарҳод Нишонов бошчилигидаги Ўзбекистон U20 терма жамоаси мазкур кубок баҳсларининг “С” гуруҳида Яман, Индонезия ва Эрон терма жамоалари билан рақобатлашади. Терма жамоамиз гуруҳдаги биринчи тур учрашувини 13 февраль куни соат 14:15 да яманлик футболчиларга қарши ўтказади. Шунингдек, бу кунда Эрон ва Индонезия терма жамоалари тўқнашуви ҳам рўй беради.

“D” гуруҳидаги илк тур ўйинларида Жанубий Корея – Сурия, Япония – Таиланд терма жамоалари ўзаро куч синашади. Учрашувлар 14 февраль куни бўлиб ўтади ва мазкур ўйинлардан сўнг биринчи тур якунланади.

Осиё кубогининг ҳар бир гуруҳда 3 та тур якунида энг яхши натижа қайд этган иккитадан терма жамоа 22-23 февраль кунлари ташкил этиладиган чорак финал босқичига йўл олади. 1/4 финалда “А” ва “B”, “С” ҳамда “D” гуруҳида биринчи ва иккинчи ўрин эгалари бир-бирларига қарши майдонга тушади. Мусобақанинг ярим финал босқичи 26 январь куни бўлиб ўтади. Финал эса 1 март куни ўтиши режалаштирилган.

Маълумот ўрнида: Осиё кубогининг ярим финал босқичига йўл олган терма жамоалар 2025 йилнинг сентябрь-октябрь ойларида Чилида ўтадиган жаҳон чемпионатига йўлланма олади.