Ertaga, 12 fevral kuni Xitoyda U20 yosh toifasida futbol bo‘yicha Osiyo kubogi boshlanadi. Unda qit’amizning 16 mamlakat terma jamoasi to‘rt guruhga bo‘lingan holda o‘zaro raqobatlashadi. Mazkur kubok 1 mart kuniga qadar davom etadi.

Chempionatning “A” guruhida Xitoy, Avstraliya, Qirg‘iziston va Qatar termalari joy olgan bo‘lib, ushbu guruhdagi ilk uchrashuvlar 12 fevral kuni bo‘lib o‘tadi. Unda Avstraliya – Qirg‘iziston, Xitoy – Qatar terma jamoalari o‘zaro maydonga tushadi. “B” guruhidagi dastlabki bellashuvlar esa 13 fevral kuni Iroq – KXDR o‘yini bilan boshlanib, Iordaniya – Saudiya Arabistoni uchrashuvi bilan yakunlanadi.

Farhod Nishonov boshchiligidagi O‘zbekiston U20 terma jamoasi mazkur kubok bahslarining “S” guruhida Yaman, Indoneziya va Eron terma jamoalari bilan raqobatlashadi. Terma jamoamiz guruhdagi birinchi tur uchrashuvini 13 fevral kuni soat 14:15 da yamanlik futbolchilarga qarshi o‘tkazadi. Shuningdek, bu kunda Eron va Indoneziya terma jamoalari to‘qnashuvi ham ro‘y beradi.

“D” guruhidagi ilk tur o‘yinlarida Janubiy Koreya – Suriya, Yaponiya – Tailand terma jamoalari o‘zaro kuch sinashadi. Uchrashuvlar 14 fevral kuni bo‘lib o‘tadi va mazkur o‘yinlardan so‘ng birinchi tur yakunlanadi.

Osiyo kubogining har bir guruhda 3 ta tur yakunida eng yaxshi natija qayd etgan ikkitadan terma jamoa 22-23 fevral kunlari tashkil etiladigan chorak final bosqichiga yo‘l oladi. 1/4 finalda “A” va “B”, “S” hamda “D” guruhida birinchi va ikkinchi o‘rin egalari bir-birlariga qarshi maydonga tushadi. Musobaqaning yarim final bosqichi 26 yanvar kuni bo‘lib o‘tadi. Final esa 1 mart kuni o‘tishi rejalashtirilgan.

Ma’lumot o‘rnida: Osiyo kubogining yarim final bosqichiga yo‘l olgan terma jamoalar 2025 yilning sentyabr-oktyabr oylarida Chilida o‘tadigan jahon chempionatiga yo‘llanma oladi.