2 июнь куни Жанубий Корея терма жамоаси Ливан пойтахти Байрутга етиб келди. Унгача эса корейслар БААнинг Дубай шаҳрида 4 кун давомида ўқув-машғулот йиғинларини ўтказишди.

Бош мураббий Байрутга етиб келгач қисқагина интервю бераркан: "Бўлажак ўйинларга жиддий тайёргарлик кўрдик. Бизни Ливан билан ўйинда фақатгина ғалаба қониқтиради. Шунингдек, Эрон ва Ўзбекистон билан ўйинларда ҳам максимал натижани кўзлаяпмиз", дея фикр билдирган.

Жанубий Корея терма жамоаси Ливанга бир қатор йўқотишлар билан етиб келди. Англиянинг "Суонси" клуби яримхимоячиси Ки Сун Йонг сариқ карточкалар "лимит"ини тўлдиргани боис ушбу ўйинни ўтказиб юборса, Германиянинг "Аугсбург" клуби ярим ҳимоячиси Ку Жа Чол эса жароҳати туфайли терма жамоага ёрдам беролмайди. Шундай бўлса-да корейслар бош мураббийи Ли Донг Гук ("Чонбук"), Ли Кеун Хо ("Сангжу"), Ли Чунг Йонг ("Болтон", Англия), Сон Хеунг Мин ("Гамбург", Германия), Жи Донг Вон ("Аугсбург", Германия) каби футболчиларнинг ҳал қилувчи ролни бажаришларига умид қилмоқда.

Ярим ҳимоя ва ҳимоядаги камчиликларни тўлдириш учун бош мураббий қария Ким Нам Ил ("Инчхон"), Ким Чи Ву ("Сеул"), Ким Чанг Су ("Кашива Рейсол", Япония) каби футболчиларни ҳам таркибга жалб қилган.

Эслатиб ўтамиз, ҳозирда Жанубий Корея терма жамоаси ФИФА рейтингида 42-ўринни банд этган бўлса, Ливан эса 129-поғонадан жой олган.

Отабек Йўлдошев, Жанубий Корея, Сеул.