Мадриднинг "Реал" клуби ярим ҳимоячи Жуд Беллингемнинг четлатилганидан норози - клуб апелляция тайёрламоқда.
Англиялик футболчи Ла Лига доирасидаги "Осасуна"га қарши ўйиннинг 39-дақиқасида қизил карточка олди. Ўн киши бўлиб қолган "қаймоқранглилар" ғалабани сақлаб қола олмади (1:1).
Маълумки, ҳакам Беллингем уни қўпол тарзда ҳақорат қилди деб ҳисоблади ва шу сабабли уни майдондан четлатди. "Қироллик клуби" вакилларининг фикрича, хавбек бунчалик қаттиқ жазога лойиқ бўлмаган бошқа сўзларни айтган. "Реал" ўзининг ҳақлигига ишонмоқда ва апелляция бериш ниятида, дея хабар бермоқда Diario AS. Эслатиб ўтамиз, футболчи икки ўйинга дисквалификация қилиниши мумкин.
Шанба кунги муваффақиятсизлик туфайли Карло Анчелотти жамоаси тур якунига кўра жадвалда биринчи ўриндан маҳрум бўлиш хавфи остида. Агар душанба куни "Барселона" "Райо Вальекано"ни мағлуб этса, "қироллик клуби" иккинчи ўринга тушади.
