Эртага бўлиб ўтадиган Ливан-Жанубий Корея учрашувидан олдинги матбуот анжуманида Ливан терма жамоаси бош мураббийи Тео Бюкер ҳамда жамоа сардори Юсуф Муҳаммадлар иштирок этишди.

Тео Бюкер (Ливан м.т.ж. бош мураббийи): "Ғалаба қозониш учун имкониятларимиз даражасидаги барча ишни қиламиз. Шу билан бирга, рақибни ҳам хурмат қиламиз. Иккала жамоа натижаларини солиштирган ҳолда қандайдир хулосалар чиқариш осон, аммо унутмангки, битта ўйинда ҳамма нарса бўлиши мумкин".

Мезбонлар бош мураббийи сўзининг давомида жамоасини келгуси ҳафталарда кутаётган икки муҳим ўйин - эртанги ва келаси сешанба куни Теҳронда ўтказиладиган муҳим учрашувларни Осиё кубоги саралаши учун яхшигина тайёргарлик сифатида кўраётганини ҳам яшириб ўтирмади. Шунингдек, немис мутахассиси жамоасини қайта шакллантириш учун кўпроқ вақт керак эканлиги ва бунинг учун албатта иложи борича кўпроқ терма жамоалар билан халқаро учрашувлар ўтказишнинг аҳамияти юқори эканини таъкидлаш билан бир қаторда, бунинг сабабларидан бири сифатида миллий чемпионат ва майдонларнинг аҳволини кўрсатиб ўтди.

Ўз навбатида, Ливан термаси сардори Юсуф Муҳаммад жамоасининг имиджи ҳар доим ижобий натижа учун ўйнашга ундашини таъкидлади: "Биз ғалабага умид қилмоқдамиз ва шу мақсадда ҳаракат қиляпмиз. Чунки айнан мана шу учрашувдаги ғалаба билан биз аввалги салбий натижаларимизга қарамай, жамоамизнинг кучини кўрсатиб қўймоқчимиз".