Қатар миллий терма жамоаси эртага Эрон билан ўз майдонида баҳс олиб боради. Бугун ўйинолди матбуот анжумани ўтказилди.

"Эронга қарши ўйин ҳар иккала жамоа учун қийин бўлади. Боиси, жамоалар мусобақа жадвалида ўрнини мустаҳкамлаш учун фақат ғалаба умидида майдонга тушади. Эрон ЖЧга чиқиш учун бизга нисбатан яхшироқ имкониятга эга, бироқ биз бу жамоага қаттиқ қаршилик кўрсатамиз. Шогирдларим тезкор ўйин кўрсатиб, бизни хурсанд қилади деган умиддаман. Бу ўйин биз учун жуда муҳим аҳамиятга эга", дейди Қатар бош мураббийи Фаҳад Тани.

"Иккита ўртоқлик ўйинида майдонга тушиб, бўлажак ўйинга жиҳатдан тактик ва руҳий яхши тайёргарлик кўрдик ва ўйинчилар яхши мавсумдан кейин ўзларини яхши ҳис қилишмоқда. Биз рақибни ҳурмат қиламиз, улар яхши жамоа, аммо ўзимизнинг энг яхши ўйинимизни намойиш қилиб, яхши натижага эришамиз, деб ўйлайман", дейди қатарлик мутахассис.

"Биз ЖЧга боришни жуда ҳам истаймиз. Шунинг учун бу ўйинда ҳам, Тошкентда бўладиган келаси ўйинда ҳам ғалаба қозонмоқчимиз", дея қўшимча қилди Фаҳад.

"Биз терма жамоа яхши натижаларга эришган "Ас-Садд" стадионида ўйнаймиз. Ушбу стадионда футболчилар ўзларининг энг яхши ўйинини кўрсатишга ҳаракат қилишади. Шогирдларим кучга тўла ва хотиржам. Клубларимиз ҳам ОЧЛда яхши натижалар қайд этишди. Биз ушбу ўйинга фақат ғалаба мақсадида чиқамиз. Бизда бошқа вариантнинг ўзи йўқ", дейди мураббий.

"Тан олиш керак, Сория буюк футболчи. Лекин биз жамоавий ўйин кўрсатамиз. Бу ерда фақат Сория ўйнамайди, биз яхлит жамоа сифатида ўйнаймиз. Унинг йўқлиги билинмаслиги керак", дейди Фаҳад Тани.