Мадриднинг "Реал" клуби ва марказий ҳимоячи Рауль Асенсио ҳамкорлик шартларини келишиб олганича йўқ.
22 ёшли футболчининг амалдаги шартномаси 2026 йилда ўз ниҳоясига етади. Испаниялик футболчи жорий мавсумда "қаймоқранглилар"нинг асосий жамоасида ўзини кўрсатди, шунинг учун клуб уни яхшиланган шартлар билан меҳнат шартномасини узайтириш билан тақдирлашга қарор қилди. El Partidazo de COPE хабарига кўра, Асенсионинг агентлари "Реал"нинг биринчи таклифини рад этишган. Манбанинг таъкидлашича, футболчи фаолиятини Европанинг бошқа нуфузли клубларида давом эттириш имкониятига эга.
Рауль Асенсио Карло Анчелотти жамоаси сафида 26 та ўйинда майдонга тушиб, 2 та голли узатмани амалга оширди.
