"Барселона" бош мураббийи Ханс-Дитер Флик ҳужумчи Ансу Фатини ҳали ҳам режаларидан чиқармаган.
22 ёшли футболчи январь ойи бошидан буён жароҳатлар ва ҳужум чизиғидаги рақобат туфайли майдонга тушмаяпти. Ушбу вазиятга қарамай, "кўк-анорранглилар" бош мураббийи ҳамон Фатининг оптимал формага кира олишига ва жамоага ёрдам беришига умид қилмоқда, деб ёзади El Pais. Флик ҳатто футболчига илҳомланиш ва ўз кучига яна бир бор ишониш учун мотивацион видеоролик тайёрлади.
Ансу Фати жорий мавсум "Барселона"нинг 8 та ўйинида майдонга тушиб, самарали ҳаракат қилмади. Испаниялик футболчининг шартномаси 2027 йилнинг ярмигача мўлжалланган.
