Ўзбекистон миллий терма жамоаси бош мураббийи Миржалол Қосимовнинг фикрича, Хитой терма жамоасига қарши ўртоқлик учрашуви Жанубий Кореяга қарши ЖЧ-2014 саралаш учрашуви олдидан яхши тайёргарлик вазифасини бажаради.

6 июнь, чоршанба куни Хитойнинг Хоххот шаҳрида Хитой ва Ўзбекистон миллий терма жамоалари ўртасида халқаро ўртоқлик учрашуви ўтказилади. Ушбу учрашув арафасида, 5 июнь, сешанба куни ҳар иккала терма жамоа бош мураббийлари иштирокида матбуот анжумани ўтказилди.

«Биз 11 июнь куни ЖЧ-2014 саралаши доирасида Жанубий Корея терма жамоасига қарши муҳим ўйинда майдонга тушамиз. Шундан келиб чиқиб, Хитойга қарши ўртоқлик учрашуви биз учун жуда фойдали ва айни муддао. Хитой терма жамоаси Осиёнинг кучли терма жамоаларидан бири ҳисобланади. Умид қиламанки, ушбу ўртоқлик учрашуви 11 июнь куни яхши ўйин кўрсатишимиз муҳим тайёргарлик вазифасини бажариб беради», - деди Қосимов.

«Хитой терма жамоасига қарши учрашувда биз учун энг асосийси – тайёргарлик , унда қайд этиладиган ҳисоб биз учун катта аҳамиятга эга эмас. Ҳар қандай ҳолатда ҳам, Хитой кучли ва ёш жамоа, шундай экан, 6 июнь куни қизиқарли ўйин гувоҳига айланамиз, деб ўйлайман», - деди Ўзбекистон миллий терма жамоаси бош мураббийи.

«Хитойда ёш терма жамоа мавжуд, унга яхши, тажрибали мутахассис бошчилик қилмоқда. Хитой терма жамоаси ярим ҳимояда тўпни кўпроқ назорат қилиб туради, терма жамоа аъзолари техник томондан кучли. Жанубий Корея билан таққослаганда, кореялик футболчилар нисбатан атлетроқ, юқорида ўйнашга ҳаракат қилишади. Умуман олганда, Хитой ва Жанубий Корея терма жамоалари ўртасидаги фарқ кўп ҳам катта эмас», - дея қўшимча қилди Ўзбекистон миллий терма жамоаси бош мураббийи Миржалол Қосимов.

Эслатиб ўтамиз, Миржалол Қосимов 6 июнь куни Хитой, 11 июнь куни Жанубий Корея терма жамоаларига қарши кечадиган учрашувлар учун жами 23 нафар футболчини жалб қилган.