Эрон терма жамоаси Доҳада Қатарни мағлуб этиб, ортга қайтаётганида жамоа сардори Жавод Некунам www.farsnews.com мухбирига интервью берди. Уни қисқартирган ҳолда эътиборингизга ҳавола қиламиз.

— Қатар терма жамоаси, шубҳасиз, Осиёнинг энг кучли терма жамоаларидан бири эди. Ушбу ўйин ҳаётимдаги энг муҳим ўйинлардан бири бўлди. Биз бу ерга катта босим ва масъулият остида ташриф буюрдик.

— Ғалаба тотли бўлдими?
— Ҳа, ғалаба ҳақиқатан ҳам тотли бўлди. Ушбу ғалаба бизга кейинги ўйинларда қўшимча мотивация ва руҳий куч беради. Бутун Эрон халқига хушкайфият улашганимиздан хурсандман.

— Бразилияга бориш учун ишонч пайдо бўлдими?
— Ўзбекистонга ютқазиб қўйганимиздан кейин барчаси қўлдан чиқди деб ўйлагандик. Лекин бизни мухлислар, жунрналистлар ва раҳбарлар қўллаб-қувватлашди. Шунингдек, Кейрушнинг хизматларини ҳам ёддан чиқармаслик лозим.

— Энди мақсадимиз янада ойдинлашгандек бўлди.
— Муваффақиятларимизда Кейрушнинг ҳиссаси катта. У ЖЧга чиқишимиз учун барча ишни қилмоқда. У терма жамоа учун қайғурмоқда, рақибларнинг ўйинини таҳлил қилмоқда, ҳар бир футболчининг ҳаракатларини ўрганмоқда. Шу сабабли ҳам Қатарга қарши ўйинда 3 очкони қўлга киритганизда Кейруш учун хурсанд бўлдим.

— Кейинги ўйин ҳам қийин ва асабий ўтади, деб ўйлайсизми?
— Унчалик эмас. Боиси, бизнинг Ливанга қарши ўйинимиз Жанубий Корея - Ўзбекистон ўйинидан кейин бошланади. Бу бизга маълум қулайлик яратади. Биз рақибларимиз ўртасидаги ўйин натижасини билган ҳолда майдонга тушамиз. Ливанни йирик ҳисобда ютиб, тўплар нисбатимизни яхшилаб олишимиз керак. Теҳрондаги "Озодий" стадионида 100 минг мухлис қаршисида Ливанни мағлуб этганимиздан кейин, сўнгги тур ҳақида ўйлай бошлаймиз.