Ливан миллий терма жамоаси ЖЧ-2014 йўлланмаси учун курашдан чиқиб кетди ва ҳозирда Эронга қарши кечадиган сўнгги тур баҳсига тайёргарлик кўрмоқда. Ливан футбол федерацияси президенти Ҳошим Ҳайдар эса, кутилмаганда, терма жамоа футболчилари ЖЧ-2014 саралашининг 4-босқичидаги баъзи ўйинларни сотиш ёки натижаларни сохталаштиришда айблади.

"Биз учинчи босқичда жуда яхши иштирок этиб, мамлакат футболи тарихида илк марта ЖЧ саралашининг сўнгги босқичига етиб келдик. Биз бу босқичда Жаҳон чемпионати йўлланмасига даъвогарлик қилиш орқали мусобақалар марказида бўлишимиз керак эди, аммо айрим футболчилар ўйинларни сотишди, букмекерлик компаниялари учун ўйинлар натижаларини сохталаштиришди. Натижада биз муҳим очколардан маҳрум бўлдик. Ваҳоланки, ҳозирги пайтга келиб, ҳисобимизда 10 ёки 12 очко бўлиши лозим эди. Бу орқали биз камида гуруҳда 3-ўрин учун курашаётган бўлишимиз керак эди", дейди Ҳошим Ҳайдар.

Ливан футболи раҳбари терма жамоанинг Жанубий Корея, Ўзбекистон, Қатар ва Эронга қарши 5та ўйинларини назарда тутмоқда. Улар:

Ливан - Қатар - 0:1 (Байрут)
Ливан - Ўзбекистон - 1:1 (Байрут)
Жанубий Корея - Ливан - 3:0 (Сеул)
Ливан - Эрон - 1:0 (Байрут)
Қатар - Ливан - 1:0 (Доҳа)

Тахминларга қараганда, ушбу ўйинлар натижалари сохталаштирилган, футболчилар букмекерлик корхоналар билан "иш" қилишган. Ҳозирги пайтда Ливан футбол федерацияси томонидан махсус комиссия тузилиб, улар мазкур 5та ўйинни ўрганиб чиқишмоқда. Комиссия раиси Фади Зурейқатнинг фикрича, ўйинлар натижасининг сохталаштирилишида ҳимоячи Рамиз Даюбнинг "ҳисса"си катта. У кейинчалик терма жамоадан бутунлай четлаштирилган.

Ҳошим Ҳайдар яна ўша "йўқотилган" очколар ҳақида гапирар экан, ўйинлар натижаларининг сохталаштирилиши натижасида Ливан 5-7 очкони бой берганини таъкидлайди. Айниқса, Қатарга қарши 2та ўйинда Рамиз Даюб ҳимояда қўпол хатоларга йўл қўйган. Мана шундай хатти-ҳаракатлар Ливанни ЖЧ орзусидан маҳрум қилди, деб ҳисоблайди Ҳошим Ҳайдар. Ушбу масалада ЛФФ раҳбари жиддий шуғулланишга қарор қилган.