Ҳозирда Пажу терма жамоа машғулот базасида тайёргарлукка зўр бераётган Жанубий Корея терма жамоаси кеча ҳал қилувчи босқич машқларини бошлади. Унга кўра, 11 июнь кунги баҳсда ҳужум чизиғида тезкор Сон Хеинг Мин (“Гамбург”) ва бўйдор ҳужумчи Ким Шин Вук (“Ульсан”) ҳаракат қилиши тахмин қилинмоқда.

Мухбирларга ўз картасини очишни истамаган бош мураббий Чой Канг Хи: "Биз Ўзбекистонни яхши биламиз. Улар олдинги босқичдагидан деярли фарқ қилмайдиган таркиб билан ҳаракатланишяпти. Кеча Хитой билан ўйинда олдинги босқичда қатнашган 7 нафар футболчилари майдонга тушганлигини эшитдим. Уларда Кей-лигадан яхши хабардор 3 нафар футболчи бор. Мени қизиқтираётгани шуки, 11 июнь куни Одил Аҳмедов қайси чизиқда ўйнашини аниқлаш муҳим. Шунга монанд тактикани топишимиз керак", дея гапни калта қилди.

Қизиғи шундаки, Ўзбекистонни жуда яхши билишини айтаётган кореяликлар Тимур Кападзени "Шаржа" футболчиси дейишмоқда.

Отабек Йўлдошев
Жанубий Корея, Сеул