Швейцариянинг "Базель" клуби аъзоси Парк Жу Хо терма жамоанинг саралаш босқичидаги 11та ўйинида иштирок этди. У охирги марта ўтган йили Тошкентда Ўзбекистонга қарши дуранг билан якунланган ўйинда иштирок этган. Шундан сўнг жамоадаги рақобатда Юн Сок Йонг ("КПР", Англия)га ўз ўрнини бой бериб қўйганди.

Тошкентдаги ўйинни эсларкан, Парк Жу Хо жумладан шундай деди: "Биласизми, мен ўзим қатнашган бирорта ўйиннинг видеоёзувини томоша қилмайман. Одатим шундай. Аммо ўтган йили Тошкентдаги дуранг билан тугаган ўйин видеоёзувини кўргандим ўшанда. Чунки иккинчи голда мен Санжар Турсунов билан курашда ютқазиб қўйдим ва жамоамнинг тайёр ғалабадан маҳрум бўлишида қайсидир маънода айбим бор. Бўйим пастлиги сабаб (174см) стандарт вазиятлар пайтида дарвоза олдидан жой эгаллайман. Лекин ўшанда негадир олдинга чиқдим ва Санжар Турсуновни "бутунлай ёпиб ташлаш"ни мақсад қилгандим. Тўғри, ушбу вазиятда Жепаровнинг тўп ошириши ҳам ажойиб чиққанди. Турсунов бу сафар ҳам Ўзбекистон терма жамоасидан жой олди. Агар 11 июнь куни майдонга тушолсам, у билан бу сафарги тўқнашувимиз бошқача бўлади".

Отабек Йўлдошев, Жанубий Корея, Сеул