"OSEN" нашри Пажудаги терма жамоа машғулот базасида химоячи Жонг Ин Хван ("Чонбук")дан Ўзбекистон билан бўладиган ўйин ҳақида қисқача фикрлари билан қизиқди.

Футболчи яқинлашаётган ўйин ҳақида фикр билдиришдан олдин Ливан билан бўлган баҳсдаги бир ҳолатга изоҳ бериб ўтди. Ўшанда учрашувнинг 39-дақиқаси ўтиб бораётган бир вақтда корейслар 0:1 ҳисобида ортда боришаркан, телекамералар Жанубий Кореянинг захира ўриндиғини намойиш этди. Унда Жонг Ин Хван 3 нафар жамоадоши билан мийиғида кулиб турганлиги акс этганди. Бу ҳолат Кореяда кескин танқид остига олинди ва "Терма жамоа мағлубиятга учраётган ва футболчиларимиз майдонда бор кучи билан ҳаракат қилаётган бир вақтда кулгуни қандай ҳазм қилди экан", деган фикрлар янгради.

Ушбу ҳолат юзасидан илк марта Жонг Ин Хван изоҳ берди: "Буни нотўғри тушунишибди. Шунча зарбалардан кейин ҳам тўп ливанликлар дарвозасига киришни "истамаганлиги"дан ҳайратда қолганча жилмайгандик. Бундан бошқача бўлиши мумкинмас".

Ҳимоячи Ўзбекистон билан ўйинга тайёргарлик ҳақида фикр билдираркан, майдонга туша олишига кўзи етмагандек: "Биз энг юқори мақсадни кўзлаган ҳолда машғулотларга зўр беряпмиз. Тан оламан, шу куни майдонга туша олиш имкониятим жуда паст. Аммо терма жамоанинг захира ўриндиғида ўтириб ҳам руҳлантира олиш ва шу орқали ғалабага ҳисса қўшиш мумкин. Ўзбекистон таркибида уч нафар "кей-лигачилар" бор. Уларга ўйин бермаслик эса ғалабага омил бўлиши мумкин. Жепаров, Гейнрих ва Кападзе жуда юқори савиядаги футболчилар. Агар ўйин куни майдонга тушишимга имкон берсалар, рақиб ҳужумини қайтариш ва стандарт вазиятларда ҳужумга ўтиб гол киритишни истайман", деди Кей-лигада фаолият юритаётган Жонг Ин Хван.

Отабек Йўлдошев, Жанубий Корея, Сеул