Руминия терма жамоаси бош мураббийи Мирча Луческу терма жамоани тарк этиш билан таҳдид қилди. Бундай муносабатга жамоанинг ЖЧ-2026 саралашининг биринчи ўйинида Босния ва Герцеговинадан учралган мағлубиятидан (0:1) сўнг матбуотдаги танқидлар сабаб бўлди.
Сан-Марино устидан қозонилган ғалабадан сўнг (5:1) Луческу журналистларга исталган вақтда терма жамоани тарк этишга тайёрлигини айтди.
"Мен ҳеч кимга жаҳл қила олмайдиган ёшдаман. Мен ёрдам бериш учун келдим. Агар шундай давом этса, исталган вақтда муаммосиз кетишим мумкин. Футболчилар баъзи салбий одатларни ўзгартириши керак.
Бу жамоа ажойиб фидойилик туфайли натижаларга эришди. Бу етарли эмас, биз ўйнашимиз ва рақибларимиз устидан устунлик қилишимиз керак. Рақобатбардош жамоа бўлиш учун устунлик қилиш, тўпга эга бўлиш керак", - деди Мирча.
