"Астон Вилла" спорт директори Мончи инглиз клуби Туркия терма жамоасининг 20 ёшли ярим ҳимоячиси Арда Гюлерни ўз сафига қўшиб олиш истагида эканлигини маълум қилди.
Испаниянинг Marca нашрига берган интервьюсида Мончи Гюлер бир қатор талабларга жавоб беришини ва клубга яхши ёрдам бера олишини айтди.
"Шахсан мен уни жуда яхши техник кўникмаларга ва терма жамоада энг ёрқин намоён бўладиган бир қатор индивидуал фазилатларга эга ўйинчи деб биламан," - деди Мончи.
Гюлер жорий мавсумда Мадриднинг "Реал" клуби сафида 18 та ўйинда майдонга тушиб, 1 та гол урди ва 3 та голли узатмани амалга оширди. Transfermarkt портали футболчининг нархини 45 миллион еврога баҳоламоқда.
