"Aston Villa" sport direktori Monchi ingliz klubi Turkiya terma jamoasining 20 yoshli yarim himoyachisi Arda Gyulerni o‘z safiga qo‘shib olish istagida ekanligini ma’lum qildi.
Ispaniyaning Marca nashriga bergan intervyusida Monchi Gyuler bir qator talablarga javob berishini va klubga yaxshi yordam bera olishini aytdi.
"Shaxsan men uni juda yaxshi texnik ko‘nikmalarga va terma jamoada eng yorqin namoyon bo‘ladigan bir qator individual fazilatlarga ega o‘yinchi deb bilaman," - dedi Monchi.
Gyuler joriy mavsumda Madridning "Real" klubi safida 18 ta o‘yinda maydonga tushib, 1 ta gol urdi va 3 ta golli uzatmani amalga oshirdi. Transfermarkt portali futbolchining narxini 45 million yevroga baholamoqda.
