"Наполи" бош мураббийи Антонио Конте келажаги ҳақидаги саволга жавоб берди.

"Милан" билан якшанба кунги учрашув бошланишидан олдин журналистлар мураббийнинг клубда қолиши ҳақида спорт директори Жованни Маннадан сўрашди. Ўйин якунлангач, савол Контенинг ўзига берилди - мутахассис "Ювентус" ва "Милан"даги лавозимга потенциал номзод ҳисобланади.

"Мен "Наполи"га жуда яхши мослашдим. Бу ерга келган биринчи кунимданоқ мени қўллаб-қувватлаб келаётган мухлислар олдида қарздорман. Ўйлайманки, биз футболчилар билан мухлисларнинг садоқати учун қисман ҳақ тўладик. Биз ғайриоддий, мўъжизавий ишни уддалаётганимизни ҳамма англаб етишини истайман. Ҳозир А Сериянинг қолган ўйинларига эътибор қаратиш керак, шундан кейингина келажак ҳақида ўйлаймиз," - дея Контенинг сўзларини келтиради Football Italia.