Бразилиялик собиқ футболчи Дани Алвеснинг рафиқаси Хоана Санс ҳомиладорлигини маълум қилди, деб ёзади Daily Mail моделнинг "Инстаграм" саҳифасига таяниб.

Испаниялик модель аввалроқ Алвес билан ажрашаётганини эълон қилганди, бироқ ажрашиш ҳақиқатда содир бўлгани ҳақида ҳеч қандай тасдиқ йўқ эди. У боланинг отаси кимлигини ошкор қилмади.

Нашрнинг қайд этишича, бразилиялик гаров эвазига қўйиб юборилганидан сўнг, эр-хотин ярашган бўлиши мумкин. Санснинг фарзанди йўқ, у илгари уч марта ҳомиладор бўлган.

Каталония судининг уч аёл ва бир эркакдан иборат жиноят ишлари бўйича палатаси Дани Алвесни зўрлашда айбсиз деб топди.

Эслатиб ўтамиз, Дани бу иш бўйича 2023 йилнинг январидан бери қамоқда эди. Зўрлаш ҳодисаси 2022 йилнинг 30 декабрида содир бўлган. Жабрланувчининг таъкидлашича, Алвес уни Барселонадаги тунги клубнинг ВИП бўлимининг ҳожатхонасига алдаб, сўнг у билан жинсий алоқа қилишга мажбурлаган.

У ўтган йилнинг февраль ойида 4,5 йиллик қамоқ жазосига ҳукм қилинган эди, бироқ бир ой ўтиб, ҳукм якуний қарорига келгунига қадар 1 миллион евро гаров эвазига қўйиб юборилди.

Каталония суди Жиноят ишлари бўйича коллегияси ишни ўрганиб чиқди ва жабрланувчининг кўрсатмалари ҳукмни ўз кучида қолдириш учун етарли эмас, деган хулосага келди.

Суд жазони 9 йилга оширишни сўраган прокурорнинг, жабрланувчининг эса жазони 12 йилга оширишни сўраган апелляциясини рад этди.