Жанубий Кореянинг "Гамбург" сафида ўйнайдиган футболчиси Сон Хеунг Мин Ўзбекистонга қарши ўйин олдидан журналистларнинг саволларига жавоб берди.

— Ўзбекистонга қарши ўйин олдидан фикрларингиз.
— Бу ўйинга алоҳида тўхталиб ўтириш шартмас. Ҳар бир уй учрашуви биз учун муҳим. Буни барча билади. Жамоадошларим билан биргаликда ушбу ўйинда ғалаба қозонишга ҳаракат қиламиз.

— Сиз илк марта терма жамоанинг матбуот анжуманига ташриф буюрдингиз. Ўзингизни қандай ҳис қиляпсиз?
— Бунча кўп журналистлар қаршисида интервью бераётганда ҳаяжонланаман. Ўзбекистонни ҳар қандай ҳолатда ҳам мағлуб этишимиз шарт. Мен майдонда шахсий манфаатимдан кўра жамоа манфаатини устун қўяман. Яхшилаб ҳаракат қилсак, ғалаба қозонамиз.

— Ливан билан ўйиндан олган таассуротларингиз.
— Жамоавий ўйин ҳамиша муҳим аҳамиятга эга. Боиси, футбол жамоавий спорт тури ҳисобланади. Эртага муҳим ўйин кутиб турганини барчамиз ҳис қилиб турибмиз. Ливанга қарши бўлиб ўтган сўнгги баҳсни таҳлил қилиб чиқдик. Биз бу ўйинда имкониятлардан фойдалана олмадик. Қолган 2та ўйинда керакли очколарни қўлга киритамиз, деб ўйлайман. Хавотирга ўрин йўқ.